اُن کے جمالِ جاں فِزا کی بات چاہیے

ذکرِ نبیؐ زُباں پہ دِن رات چاہیے

جس کی فضا خمارِ محبت سے چُور ہو

رحمت لُٹے جہاں وہ خرابات چاہیے

ہر لحظہ آنسوؤں سے گریباں تر رہے

عشقِ نبیؐ کے درد کی بُہتات چاہیے

تنہائیوں میں نعتِ نبیؐ کا اثر تو دیکھ

ویران دِل کو بارشِ نغمات چاہیے

بھیجا کر اب دُرود کے تحفے نبیؐ کے نام

اے دِل! تجھے تلافئ مافات چاہیے

دہلیزِ آلِ فاطمہؓ ہو اور سرِ نِیاز

مجھ کو فقط غلامئ سادات چاہیے

مضبوط ہو تعلقِ خاطر حضورؐ سے

محکم ہو رابطِ جاں وہ مناجات چاہیے