← حرفِ نیاز
جان و دِل، سینہ و جگر قُرباں
دین و ایمان شاہؐ پر قُرباں
عالَمِ قُدس ہے نثار اِدھر
محفِلِ آب و گُل اِدھر قُرباں
شام ہے تیرے گیسوؤں پہ فِدا
رُخ پہ ہے جلوۂ سحر قُرباں
مطلعِ نُورِ حق وہ پیشانی
اِس اُفق پر نظر نظر قُرباں
آپؐ پر شِیفتہ ہے ربِ کریم
کرتے ہیں انبیاء بھی سر قُرباں
ہیں مدینے کی شاہراہوں پر
ساری دُنیا کے بام و در قُرباں
کیا کرے نذرِ ساجدؔ ناچیز
کہ کرے مجھ سا بے ہنر قُرباں