زِفرق تابقدم نور ہے رسولِؐ خدا

نشے میں ذات کے محشور ہے رسولِؐ خدا

جنابِ حق میں ہر اِک بات ہے قبول تری

ہر التجا تری منظور ہے رسولِؐ خدا

ہے تیری یاد کی مَستی مِری رگ و پے میں

ترے خُمار سے دل چُور ہے رسولِؐ خدا

خدا کے نام کے پہلو میں نامِ پاک ترا

جبینِ عرش پہ مسطور ہے رسولِؐ خدا

کسے ہے تاب کہ دیکھے وہ رُخ بغیر حجاب

ہزار جلوؤں میں مستور ہے رسولِؐ خدا

ہوائے خُلد چلی ہے‘ چھڑا ہے ذکرِ ترا

فضا نشاط سے معمور ہے رسولِؐ خدا

ہر ایک قول ہے لاریب زِندگی کا اصول

ہر اِک عمل تیرا منشور ہے رسولِؐ خدا