← حرفِ نیاز
ہو مبارک خوشی کے دن آئے
لطفِ نعتِ نبیؐ کے دن آئے
دل ہوا اُن کی یاد سے تازہ
اے خوشا! زندگی کے دن آئے
آ گیا موسمِ نشاط و طرب
طرفہ خرسندی کے دن آئے
ہے محبت کا نور آنکھوں میں
مستی و بے خودی کے دن آئے
ہر زباں پر ہے ذکرِ صلِّ علیٰ
مرحبا خرّمی کے دن آئے
نورِ عرفاں کی ہے فراوانی
جلوۂ آگہی کے دن آئے
لُٹ رہا ہے خزینۂ رحمت
دولتِ سرمدی کے دن آئے
جان و دل کی فضا مہک اُٹھی
کیا عجب زندگی کے دن آئے
اے خوشا! یادِ حُسنِ پیغمبرؐ
ساجدؔ اب شاعری کے دن آئے