ہو مُبارک، خُوشی کے دِن آئے

لُطفِ نعتِ نبیؐ کے دن آئے

دِل ہوا اُن کی یادسے تازہ

اے خُوشا! زِندگی کے دِن آئے

آ گیا موسمِ نَشاط و طرب

طرفہ خرسندگی کے دِن آئے

ہے محبت کا نُور آنکھوں میں

مَستی و بے خُودی کے دِن آئے

ہر زُباں پر ہے ذِکرِ صلِّ علیٰ

مرحبا خرّمی کے دِن آئے

نُورِ عِرفاں کی ہے فراوانی

جلوۂ آگہی کے دِن آئے

لُٹ رہا ہے خزینۂ رحمت

دولتِ سرمدی کے دِن آئے

جان و دِل کی فضا مہک اُٹھی

کیا عجب زِندگی کے دِن آئے