مسرور دِل ہے ‘ شاد ہے جاں اُن کے شہر میں

آباد نُور کا ہے جہاں اُن کے شہر میں

ذرے یہاں کے صورتِ انجم ہیں ضَوفِشاں

ہر رہگزر ہے کاہکشاں اُن کے شہر میں

ہر صبح جاں فروز ہے ‘ ہر شام دِل نَواز

ہر لحظ ہے خُوشی کا سماں اُن کے شہر میں

فیضانِ لُطف سے دِل وجاں پُر خُمار ہیں

دریا ہے بے خُودی کا رواں اُن کے شہر میں

ہے شوق یامراد ‘ تمنا ہے کامران

نصرت کے اَن گِنت ہیں نِشاں اُن کے شہر میں

اُٹھتے ہیں چشمِ دِل سے حِجابات وہم کے

ہوتا ہے پاش پاش گُماں اُن کے شہر میں