جو دِل سے شاہِ اُمم کا نیازمند ہُوا

وہ خُوش نصیب زمانے میں سر بُلند ہُوا

ہے جِسمِ پاک اگر چشمِ رُخ سے پوشیدہ

درِ وصال کہاں چشمِ دِل پہ بند ہُوا

ہے وہ سعید جسے راہبر حدیث ہوئی

ہے سُرخروکہ جو پابندِ حرفِ پند ہُوا

جہاں کے رنج و الَم سے اسے نَجات ملی

جو دِل کہ اُن کی محبت میں دردمند ہُوا

قدِ جمال کو سَمجھا جو حق کا آئینہ

وہ بے نِیازِ خیالاتِ بیش و چند ہُوا

نبیؐ کا تذکرہ جس جس لب و زُباں پر ہے

زُبان خوب لگی‘ حق کو لب پسندہُوا