جہاں میں اُن سا کوئی صاحبِ جمال نہیں

حبیبِؐ حق کی طرح کوئی باکمال نہیں

رُخِ نبیؐ کی مُفسّر نہیں کوئی تشبیہ

جمالِ پاک کی شارح کوئی مِثال نہیں

میں آنحضورؐ کو’’ نُور و سرُور‘‘ پیش کروں

یہ شوق خوب ہے لیکن مِری مجال نہیں

ہر ایک لحظہ مِری زِندگی کا اُن پر فِدا

نثار شاہؐ پہ کب میرے جان و مال نہیں

ہے مصطفٰےؐ پہ عَیاں دِل کی داستاں ساری

گداگروں کو یہاں حاجتِ سوال نہیں

نِگاہِ لُطف سے مُفلس کو وہ غنی کر دیں

حضورؐ کے لیے مُشکل نہیں مُحال نہیں