اُن کے جمالِ رُخ کی رہی بات ‘ رات بھر

تھے ہر زُباں پہ آپؐ کے نغمات ‘رات بھر

گزری تمام رات صلوٰۃ و سلام میں

بٹتا رہا خزینہِ برکات ‘ رات بھر

کوئی ہمیں سناتا رہا اُن کے تَذکِرے

ہوتا رہا نزولِ عِنایات ‘ رات بھر

کتنے ہی ماہتاب تھے محفِل میں ضَوفشاں

برسی ہے خوب نُور کی برسات ‘ رات بھر

اُس چشمِ اِلتِفات نے بے حد کرم کیا

دیکھی ہے ہم نے لُطف کی بُہتات ‘ رات بھر

انبوہ تشنگاں تھا سرِ سَلسبیلِ فیض

واللہ جو تھی صورتِ حالات ‘ رات بھر