نبیؐ کے جِسم کی خُوشبو ہے بَطحا کی ہواؤں میں

اُنہی کے حُسن کے ہیں رنگ پھولوں کی قباؤں میں

غلامانِ محمدؐ کو یُونہی مت دیکھ بے ساماں

قِیامت کا لیے سامان بیٹھے ہیں نَواؤں میں

وسیلے سے نبیؐ کے مانگ جو ہے مانگنا تُجھ کو

قبولیت کا ہے جوہر نِہاں ایسی دعاؤں میں

جھڑی اشکوں کی ہے آلام میں پیغامِ رحمت کا

چُھپے ہوتے ہیں موتی قیمتی کالی گھٹاؤں میں

محمدؐ کی گلی کے ہیں بِھکاری رومیؒ و جامیؒ

سلاطینِ زمانہ ہیں سبھی ان کے گداؤں میں

بصدقِ اِخلاص اُن کے در پہ دامانِ طلب پھیلا

سَمُندر ہیں سخا کے موجزن اُن کی عطاؤں میں