ہیں عرش و فرش پہ اُن کے جمال کی باتیں

وفا و مہر کی، جُود و نوال کی باتیں

نبیؐ کی دید تھی سامانِ زِندگی جِس کا

سُنی ہیں تم نے وہ شوقِ بلالؓ کی باتیں

ہیں مہر و ماہ کے لب پر کہانیاں اُن کی

جلال کے وہ فسانے جمال کی باتیں

وہ بے مِثال ہیں ہر بات بے مِثال اُن کی

کہاں سے لاؤں میں اُن کی مِثال کی باتیں

ہے قُدسیوں کی زُباں پر نبیؐ کا ذِکرِ جمیل

مِرا وظیفۂ جاں اُن کی آلؑ کی باتیں

ملے جو کوئی ہمیں باکمال اُس سے سنیں

جَنابِ شاہِؐ رُسُلؐ کے کمال کی باتیں