شاہِ رُسُلؐ کی یاد رگِ جاں ہے آج کل

کیف و سُرور دِل میں فَراواں ہے آج کل

ہر جزو سے زیارتیں کُل کی نصیب ہیں

ہربرگ سے شہودِ گُلستاں ہے آج کل

بخشی نِگاہِ لُطف نے وِجدان کو بہار

ہر حرف مجھ کو آیتِ عِرفاں ہے آج کل

اُن کی نِگاہ راہبر ہے پاسبان ہے

ہر ایک راستہ مجھے آساں ہے آج کل

اب نو بہارِ آرزو میری ہے اوج پر

پہلو میں میرے شوق کا طوفاں ہے آج کل

یہ کون بس گیا ہے حریمِ خِیال میں

فصلِ خزاں بہار بداماں ہے آج کل