رکھتی ہے دل کو مہکا ہُوا یادِ مصطفیٰ

تسکیں نَواز‘ روح فِزا یادِ مصطفؐےٰ

ذکرِ حبیب سے رہے تازہ مِری زُباں

مجھ کو بھی بخش میرے خدا یادِ مصطفؐےٰ

اِنعام ہے خصوصی خُدائے کریم کا

ربِّ جہاں کی خاص عطا یادِ مصطفؐےٰ

تابِ جمال ہے وہ جلوہ زارِ حُسن

جس دل کا ہے وظیفہ سدا یادِ مصطفؐےٰ

تنہائیوں میں نامِ نبیؐ ہے [اَنیسِ جاں

ہے خلوتوں میں نغمہ سرا یادِ مصطفؐےٰ

ذرّے رہِ رسُولؐ کے اب بھی ہیں تابناک

کرتی ہے اب بھی غارِحِرا یادِ مصطفؐےٰ

کہتا ہے کون یادِ نبیؐ‘ یادِ حق نہیں

دونوں ہیں ایک یادِ خدا یادِ مصطفؐےٰ

نامِ نبیؐ ہے راہبرِ منزلِ یقیں

کرتی ہے تیز شوقِ لقا یادِ مصطفؐےٰ

ہر تازہ نعت تازہ مسرّت کی ہے نوید

رکھتی ہے شاد صبح و مسا یادِ مصطفؐےٰ