رُخِ تیرا تصوّر میں ضیاء بار ہے خواجہ

محشور ہے دل جاں میری سرشار ہے خواجہ

خورشید کے جلوے ہیں ترے در کے بھکاری

دہلیز تری مطلعِ انوار ہے خواجہ

اس خاطر غمکیں کا مقدر ہے مبارک

جس خاطر غمناک کا غم خوار ہے خواجہ

اِک دنیا جدائی میں تری نالہ کناں ہے

اِک دنیا ترے درد میں بیمار ہے خواجہ

ہر گوشے میں برسا ہے ترے لطف کا بادل

رحمت تیری ہر سمت گہر بار ہے خواجہ

ہے نام ترا مونسِ جاں جانِ دو عالم

یہ نام علاجِ غمِ بیمار ہے خواجہ