اِدھر بھی بادِ صبا! لا پیامِ بطحا کا

مرے لبوں پہ کب آئے گا نامِ بطحا کا

حدیثِ شہرِ نبیؐ کس قدر ہے جاں افزا

سکوں نواز ہے بے حد کلامِ بطحا کا

نبیؐ کے شہر سے تعبیرِ حُسنِ عالم کا

میں چومتا ہوں بصد شوق نامِ بطحا کا

خرد کی آنکھ بہت کم نظر ہے آؤ چلیں

نگاہِ عشق سے پوچھیں مقامِ بطحا کا

بقدرِ ظرف سمایا ہر ایک دل میں نشہ

ہے فیض یافتہ ہر خاص و عام بطحا کا

زمانے بھر کی نگاہوں میں محترم ہیں وہی

جنہوں نے دل سے کیا احترامِ بطحا کا