محمدؐؐ عربی تیرا نُور یا اللہ!

خوشا یہ نُور یہ شان ظہور یا اللہ!

تِرا نبیؐ ہے متین و غیور یا اللہ!

رسُولؐ تیرا جمیل و صبور یا اللہ!

رُخِ رسُولؐ ہے نُورِ جمال کا مطلع

تجلّیوں کا محلِّ صدور یا اللہ!

نوید دے گئی تورات اُن کی آمد کی

پتا بتا گئی اُن کا "زبور" یا اللہ!

محمدؐؐ عربی مظہرِ کمال تِرا

کہاں ہے ذات تِری اِس سے دُور یا اللہ!

تِرا نبیؐ ہے مجسّمِ نِشاط و سرمستی

تمام راحَت و کیف و سرُور یا اللہ!

مِری نظر کو فقَط چاہیے تِرا محبوب

نہ چاہیئیں مجھے حُور و قصور یا اللہ!

تِرا رسُولؐ ہے پَیکرِ تِری تجلّی کا

زفرق تا بقدم سرّ و نُور یا اللہ!