ہر حسیں شے میں جلوہ فشاں آپؐ ہیں

نورِ یزداں ہیں روحِ جہاں آپؐ ہیں

ایک دنیا ہے سرشاریوں کی وہاں

مستیوں کا جہاں ہے جہاں آپؐ ہیں

میرے خواجہؐ! اِدھر بھی نگاہِ کرم

میرے مولیٰ! مسرّت کی جاں آپؐ ہیں

بسکہ تاریک ہے دل کی دنیا مری

ایک جلوہ کہ نورِ جناں آپؐ ہیں

راہِ منزل منوّر ہوئی آپؐ سے

جلوۂ حق ہے جس سے عیاں آپؐ ہیں

نور ہی نور پودے ہیں جس باغ کے

اِس کی فصلِ گلِ جاوداں آپؐ ہیں

جبرئیلؑ امیں ہے فقیر آپؐ کا

حُور و غلماں کے محبوبِ جاں آپؐ ہیں