فکر و دانش میں سماتی ہے کہاں شانِ رسول ﷺ

جلوۂ ذات سے روشن ہے شبستانِ رسول ﷺ

مجھ سے ممکن ہی نہیں اُن کی نوازش کا حساب

میں بیاں کیسے کروں قصّۂ احسانِ رسول ﷺ

طالعِ خفتہ کو بیدار کیا رحمت نے

چند دن ہم بھی رہے شکر ہے، مہمانِ رسول ﷺ

آپ ﷺ سے بڑھ کے زمانے میں نہیں کوئی نبی

زمرۂ قدس کا سردار ہے دربانِ رسول ﷺ

ہیچ زر اس کی نظر میں ہے پڑگاہ⚠️ سے کم

ہو بھی جس کو عطا دولتِ عرفانِ رسول ﷺ

شاہِ لولاک ﷺ کی اولاد سے آباد جہاں

غیرتِ گلشنِ جنّت ہے گلستانِ رسول ﷺ