پیشِ نظر جہاں کا ہو سُلطان رات دِن

اُن کا کرم ہو ہر گھڑی ہر آن رات دِن

اُس بارگاہِ پاک میں لُٹتا ہے عام نُور

بٹتا ہے عامِ ذاتِ کا عِرفان رات دِن

اللہ کا حبیبؐ ہے مولائے کائنات

آفاق پر ہے آپؐ کا احسان رات دِن

قُدسی درِ جَنابِ رِسالت مآب پر

بن کر کھڑے ہیں با ادب دربان رات دِن

یا ربِّ! نبیؐ کا شوقِ فَراواں نصیب ہو

روشن رہے یہ دِل مِرا یہ جان رات دِن

خِدمت میں اُن کی میں رہوں مشغول ہر گھڑی

آتے رہیں رسُولؐ کے مہمان رات دِن