بَلائیں لیتا ہے عرشِ بَریں مدینے کی

ہے آسماں سے بھی اُونچی زمیں مدینے کی

ہے جلوہ گاہِ نبیؐ رحمتوں کا گہوارہ

فضا ہے کتنی جمیل و حَسِیں مدینے کی

نبیؐ کے شہرِ مقدّس کا تذکرہ چھیڑو

ہے داستاں بہت دِلنشیں مدینے کی

نکال راہ بُجھے تَشنَگی؟ قلب و نظر

سَبیل ڈھونڈ کوئی ہم نشیں! مدینے کی

قدم قدم پہ یہاں قیمتی خزانے ہیں

ہے موتیوں سے بھری سرزمیں مدینے کی

ہر ایک صبح زہےصبحِ عیداور ہر شب

شبِ برات سے کچھ کم نہیں، مدینے کی