رُخ آپؐ کا کِس درجہ ضیابار ہے خواجہؐ!

مخمور ہے دِل ‘ جاں مِری سَرشار ہے خواجہؐ!

خورشید و مہ ومہر جہاں آتے ہیں جھُک کر

در آپؐ کا وہ مطلعِ اَنوار ہے خواجہؐ!

اِس خاطِر ناشاد کی قِسِمت ہے مُبارَک

جِس خاطرِ ناشاد کا غم خَوار ہے خواجہؐ!

اِک دُنیا محبت میں شب و روز ہے گِریاں

اِک قوم غمِ ہجر میں بیمار ہے خواجہؐ!

ہر گوشہ میں برسا ہے عِنایات کا بادل

لُطف آپؐ کا ہر سِمت گُہربار ہے خواجہؐ!

نام آپؐ کا خَلوت میں مِرا مُونسِ جاں ہے

یہ نام عِلاجِ دِلِ بیمار ہےخواجہؐ!