کِس کی زُباں ثنائے محمدؐ سے تر نہیں

میں ہی جمالِ شاہؐ کا اِک نغمہ گر نہیں

راہِ خِرد میں کوئی بھی کیف و اثر نہیں

لگتا ہے میرے ذوق کی یہ رہگزر نہیں

نالے میں اِضطِراب فُغاں میں اثر نہیں

میرا جہانِ شوق ابھی معتبر نہیں

کب میرے حالِ زار سے ہیں بے خبر حضورؐ

کب میرے حالِ زار کی اُن کو خبر نہیں

جب سے ہوئی ہے یادِ نبیؐ مُونس و رفیق

مجھ کو رہِ حیات میں کوئی خطر نہیں

وہ میرے کارساز ہیں وہ میرے جاں نَواز

اُن کے سِوا کِسی پہ بھی میری نظر نہیں