سلطانِ برگزیدہ کا ایواں نظر میں ہے

دیوار و در ہیں جِس کے درختاں نظر میں ہے

پیشِ حریم دھڑکنیں دل کی ہیں نغمہ خواں

آرامگاہِ فخرِ رسولاں نظر میں ہے

محرابِ مصطفیٰؐ پہ ہجومِ تجلّیات

شاہِ رسلؐ کا منبرِ تاباں نظر میں ہے

کُھلتی جہاں ہیں گرمیِ دل بستہ کار کی

ہوتا جہاں ہے دردِ کا درماں نظر میں ہے

بُجھتی ہے دیکھ کر جسے غمگیں دلوں کی آگ

شاہِ جہاں کا گنبدِ ذی شان نظر میں ہے

شب ہے سحر بدوش، سحر گُل بدست ہے

دن ہو کہ رات حُسنِ بہاراں نظر میں ہے