ہوتی فزوں ہے دِل کی خُوشی اُن کے نام سے

ملتی ہے زِندگی بھی نئی اُن کے نام سے

اُن کے کرم سے آ گئی پھر سے بہارِ گُل

ہے خشک شاخ پھر سے ہری اُن کے نام سے

ایوانِ حق میں خاطِرِ غمگیں کی اِلتجا

جب بھی ہوئی قبول ہوئی اُن کے نام سے

حیلے ہزار لاکھ کیے کچھ نہ بن پڑا

جب بھی بنی ہے بات بنی اُن کے نام سے

جِس کو ملا ہے جو بھی ملا اِس جہان میں

تھوڑا ہے یا بہت ہے سبھی اُن کے نام سے

کچھ بھی رہے نہ یاد مجھے اُن کی یاد میں

وابستگی ہو ایسی مِری اُن کے نام سے