محمدؐ عربی شاہِ انبیاءؐ آئے

صِفات و ذات کا آئینۂ صفا آئے

تھے شہرِ فکر و نظر کے مُہیب ویرانے

بہ طرحِ نَو پئے تعمیر ‘ مصطفٰیؐ آئے

خُدا کا نُور بشکلِ بشر ہُوا ظاہر

جہاں کی روشنی کو پَیکرِ ضِیا آئے

ضمیرِ آدمی بے گانۂ محبت تھا

بَہَم ملانے دِلوں کو وہ دِلرُبا آئے

ریاضِ دَہر تھا ویران دشت کی صورت

بہار بن کے وہ محبوبِؐ کِبریا آئے

نکھر گیا رُخِ ہستی‘ سنور گئے حالات

وہ زیبِ تن کئے قُرآن کی قبا آئے