آئے ہیں ہم ہجومِ تمنّا لیے ہوئے

دستِ طلب میں وسعتِ صَحرا لیے ہوئے

پہلی نِگاہ میں ہی تماشا وہ بن گئے

آئے جو دِل میں شوقِ تماشا لیے ہوئے

ہر چیز دُھل کے روشنی میں چاند ہو گئی

جب آئے مصطفٰیؐ رُخِ زیبا لیے ہوئے

بَطحا کی سِمت قافلے دِن رات ہیں رواں

رفتار میں روانیٔ دریا لیے ہوئے

اُن کے غلام ذات میں اپنی ہیں انجمن

بیٹھے ہیں دِل میں نُور خُدا کے لیے ہوئے

حقِ کا رسُولؐ مظہرِ اکمل ہے ذات کا

اِک دِل نشیں حَسینؓ سراپا لئے ہوئے