نبیؐ کے شہر میں میرا قیام ‘ صلِّ علیٰ

یہ حاضری یہ صلٰوۃ و سلام ‘ صلِّ علیٰ

میں مر چلا تھا مِرے دم میں پھر سے دم آیا

بنامِ سیدِؐ عالی مَقام ‘ صلِّ علیٰ

طلب سے بڑھ کے نَوازا ہے دستِ رحمت نے

کرم سے اُن کے ہے دِل شادکام ‘ صلِّ علیٰ

ہیں ذرّے خاکِ مدینہ کے آسماں کے نجوم

بفیضِ نِسبتِ خیرؐالانام ‘ صلِّ علیٰ

خُدا کرے ہو یہیں پر گزر بسر میری

یہیں پہ ہو میری عمر تمام ‘ صلِّ علیٰ

شبانہ روز نبیؐ سے یہ ربط مُحکم ہو

رہے جنابؐ سے نِسبت مُدام ‘ صلِّ علیٰ