بقولِ ’’مَن رَاٰنِی‘‘ یہ عَیاں ہم پر ہُوا واللہ

ہے اُن کو دیکھنا گویا ‘ جمالِ حق دیکھنا واللہ

وہی ذاتِ احَد جو باطناً مسجُودِ عالَم ہے

اُسی کا نُور ہے ظاہر ‘ بذاتِ مُصطفٰیؐ واللہ

خُدا ہرگِز نہیں ہیں وہ ‘ مگر واصِل خُدا سے ہیں

خُدا کے نُور سے وہ نُور ‘ پیکرِ حق نُما واللہ

مِری چشمِ تَصوُّر میں رہے وہ صورتِ زیبا

وہی مقصودِ جاں میرا وہی ہے مُدّعا واللہ

خُدا مُطلِق ہے اور پابندِ صورت شان اُس کی ہے

بشکلِ مُصطفٰےؐ شانِ خُدا ہے رُونما واللہ

زباں اظہار سے ہے گُنگ اور حرف و بیاں قاصرـ

ہے ذاتِ حق سے قُرب اِتنا رسُول اللہ کا واللہ